Bölüm On Beş

"Uğur, hazırlıq və fürsətin qovuşduğu nöqtədə yaranır."

- Bobby Unser

Bölüm On Beş

İnsanlar azərbaycanlı olduğumu bildikdən sonra iki fərqli reaksiya ilə qarşılaşdım. Bir qismi "Eh, azərbaycanlı yazarları oxumuram," - deyərək marağını itirirdi. Digər qismi isə təəccüblə, *"Azərbaycanda belə yazıçılar da var imiş?"* - deyib məni izləməyə başlayırdı.

Vəziyyət o yerə gəlib çatdı ki, əvvəllər kitab təklif etdiyimdə mesajıma cavab belə verməyən kitab bloggeri səhifələri indi özləri yazıb kitabı oxumaq istədiklərini bildirirdilər. Təbii ki, kin saxlamadım, "o vaxt məni geri çevirmişdiniz" demədim. Sadəcə kitabı hədiyyə etdim. Bir müddət sonra İnstagram dünyasında *Hərbidən Qeydlər* haqqında danışmayan adam qalmadı.

İş o həddə çatdı ki, küçədə gedərkən məni saxlayıb soruşurdular:

- Siz Uraqansınız?
- "Hərbidən Qeydlər" kitabının müəllifisiniz?
- Şəkil çəkdirmək olar?

Bu diqqət əvvəlcə məni sevindirdi. Amma zaman keçdikcə bir az qorxu da yaratdı. Çünki bəzən belə mesajlar alırdım:
*"Sizi küçədə gördüm, yanınızda bir qız var idi..."*

Bu cür mesajlar məni narahat edirdi. Sosial bir insan olsaydım, bəlkə də şəxsi həyatım demək olar ki, olmayacaqdı.

Bütün bu maraq içində hələ də kitabı rəsmi satışa çıxarmamışdım. Oxucuların marağı əsasən kitabı əldə edən tanınmış insanların xoş sözlərindən qaynaqlanırdı. Mən isə rəsmi satış üçün imza gününü gözləyirdim.

İmza günü əvvəlcədən təyin olunmuşdu, amma 20 gün ertələndi. Bu müddətdə marağı diri saxlamaq üçün qərara gəldim: bir müsabiqə keçirəcəyəm. Şərtlər sadə idi: 7 oktyabrda kitab satışa çıxdıqdan sonra oxucular kitabın içindən çıxan əlfəcini saxlamalı idilər. İmza günündə isə həmin əlfəcinin üzərinə öz ürək sözlərini yazıb qapalı bir qutunun içinə atacaqdılar. Tədbirin sonunda bir nəfər təsadüfi şəkildə seçiləcək və ona 20 AZN-lik hədiyyə kartı veriləcəkdi.

Bu addım da uğurlu oldu. İmza günü, bir çox yazıçının doldura bilmədiyi salonu mən doldura bildim. Yəni anlayacağınız, müsabiqə keçirmək çılğınlığı daha o vaxtlardan mənimlə birlikdə gəlmiş və təcrübə qazandıqca bu cür təşəbbüslər daha da təkmilləşdi.

İmza gününün videosu:
https://youtu.be/g_yI6d8NsxY?si=kIV2MpMuFXpoN9wM