Hüseyn Dərya (Hüseyn Muradov) - Qısa bioqrafiya

Hüseyn Dərya (tam adı: Hüseyn Cahangir oğlu Muradov; 29 iyun 1975, Bakı – 15 mart 2014, Bakı) — Birinci Qarabağ müharibəsi iştirakçısı, Azərbaycan repçisi və aktyorudur. O, Azərbaycan rep musiqisinin inkişafında mühüm rol oynamış, sosial mövzulara və insan talelərinə toxunan sərt və səmimi üslubu ilə geniş dinləyici auditoriyası qazanmışdır.

Hüseyn Dərya Bakıxanov qəsəbəsində anadan olmuşdur. Atası əslən Laçınlı, anası isə Kəlbəcərli və Ermənistan azərbaycanlısıdır. İlk təhsilini Nərimanov rayonunda yerləşən 4 saylı fars dili təmayüllü internat məktəbində almış, burada musiqiyə və vəznlərə marağı formalaşmışdır. Daha sonra Bakı Dövlət Universitetinə qəbul olunmuş, lakin təhsilini davam etdirməyərək Birinci Qarabağ müharibəsində iştirak etmişdir. O, dörd il iki ay hərbi xidmətdə olmuşdur.

Hüseyn Dərya musiqi karyerasına 2000-ci ildən başlamışdır. Hip-hop janrında fəaliyyət göstərmiş, Elariz Məmmədoğlu, İlhamə Quliyeva, Vahid Qədim və digər sənətkarlarla əməkdaşlıq etmişdir. Onun yaradıcılığı Azərbaycan rep musiqisində sosial mesajları və həyatın reallıqlarını əks etdirən nümunələrdən hesab olunur.

Hüseyn Dərya iki dəfə ailə həyatı qurmuşdur. İlk həyat yoldaşı Sevda xanımdan 2003-cü il təvəllüdlü Ayşə adlı qızı, ikinci həyat yoldaşı Sona Muradovadan isə 2006-cı il təvəllüdlü Cahangir adlı oğlu olmuşdur.

O, 15 mart 2014-cü ildə avtomobil qəzası nəticəsində vəfat etmişdir. Onunla vida mərasimi Yasamal rayonunda bacısının evində keçirilmiş, mərasimə ailə üzvləri, yaxın dostları, sənətkar həmkarları və hətta uzun illər aralarında fikir ayrılığı olmuş repçi Anar Nağılbaz da qatılmışdır. Hüseyn Dərya Bakıxanov qəsəbəsindəki qəbiristanlıqda dəfn olunmuşdur.

Hüseyn Dəryanın vəfatından sonra onun irsi Azərbaycan musiqi ictimaiyyətində yaşadılmağa davam etmişdir. 2014-cü ildə repçi DaDo və müğənni Natavan Həbibi onun xatirəsinə “Yat dostum” adlı mahnını həsr etmişlər.

Diskoqrafiya (studiya albomları):

2 Həyat (2002)

Keçdi günlər (2004)

2 Yol

Mahnılarından bəziləri:

Həyat

Sevmirəm

Dərviş rep

Xatirə

Rep meyxana

Soy

Sevən ürəyim

Məhəlləmiz (Kef elə)

İnsan

Oyan bəxtim

Dost

Çingiz Mustafayev

Rep oxu

Məktub

Ay can, ay can

Sənsən

Kişi kimi

Çal-çağır

Kim kimdir?

Bir göz qırpımında

Zəfər nəğməsi