Paralel Həyatlar Körpüsü

Paralel həyatlar körpüsü:

Ənənəvi roman strukturlarından kənara çıxan bu kitab oxucuya sadəcə müşahidəçi yox, birbaşa iştirakçı olmaq imkanı verir. Hekayənin gedişatı, inkişaf xətti, hətta sonluğu belə oxucunun verdiyi qərarlardan asılı olaraq dəyişir. Kitabın əsas ideyası sadə, amma bir o qədər də cəsarətlidir: “Oxucu oxuduğu hekayəni yönləndirə bilərmi?” Cavab birmənalıdır: bəli! Bu əsərdə oxucu təkcə səhifə çevirən deyil, həm də taleyin ipini öz əlinə alan bir qəhrəmandır. Oxuduqca qarşısına seçimlər çıxır: sağa getsin, ya sola? Qaçsın, yoxsa savaşsın? Bağışlasın, ya da intiqam alsın?

Bu seçimlər isə onu fərqli zamanlara və məkanlara aparır. Bir səhifədə orta əsrlərin tozlu küçələrində dolaşır, növbəti fəsildə isə nağıllar aləmində sehrli varlıqlarla qarşılaşır. Oxucu bir yerdə qatildən qaçan bir qurban, başqa bir ssenaridə isə öz qurbanının izinə düşən bir ovçuya çevrilir.

Kitabda hadisələr ruhun dünyaya gəlməzdən öncəki seçimləri ilə başlayır. Mələk dünyaya yollanmaq istəməyən ruha sual verir. Qızı seçmək istəyirsən, yoxsa oğlanı? Hər seçimi onu fərqli həyatları yaşamağa vadar edəcək. Ruh qadını seçsə, təkrar qarşısında bir seçim açılacaq. Sevgi, yoxsa güc? Oğlanı seçərsə, iki seçim: od, yoxsa su? Kitabı hər dəfə əvvələ qayıdıb başqa bir seçimlə oxuduqca onun içində sirli qapılar açılır. Bu qapılar bəzən oxucunu gözəl həyata sürükləyərkən bəzi yanlış seçimlər də məhvə doğru sürükləyir.