İyirmi Manatlıq Müsabiqə

İyirmi manatlıq müsabiqə:

“ manatlıq müsabiqə” satira və yumorun incə qatlarla yoğrulduğu, yazıçının oxucusu ilə sarkazm vasitəsilə danışdığı qeyri-adi bir əsərdir. “İyirmi manatlıq müsabiqə” devizi ilə başlayaraq hər səhifəsində oxucunu həm güldürür, həm də düşündürür.

Kitabın ilk hissəsi optimist bir çağırışla başlayır: “Bu kitabı al və iyirmi manatlıq müsabiqəyə qoşul!” Lakin oxucu irəlilədikcə başa düşür ki, bu müsabiqə də digərləri kimi, əslində, sadəcə görüntüdən ibarətdir – çünki qalib onsuz da əvvəldən bəllidir: yazıçının “bacoğlusu”!

Müəllif bu ironik yanaşma ilə saxta müsabiqələrə, qeyri-obyektiv seçimlərə, cəmiyyətdəki qohumbazlığa güzgü tutur. “Bacoğlu” obrazı isə sadəcə bir “adam” deyil – o həm satirik fiqurdur, həm də müəllifin cəmiyyətlə ironik dialoqunun canlandırılmış formasıdır. Yazıçı ona “məsləhətlər” verir – amma bu məsləhətlər nə doğrudan-doğruya faydalıdır, nə də tamamilə zarafatdır. Onlar reallığın içində bir sarkazm tufanı kimi dolaşır: oxucunu gah güldürür, gah da içində gizlətdiyi kədəri üzə çıxarır.

Bu kitab doya-doya gülmək, eləcə də dərindən düşünmək istəyənlər üçündür. Bu kitabı oxuyanda təkcə bir satira ilə qarşılaşmırsan – öz həyatının müsabiqəsinə düşürsən və sonda başa düşürsən ki, qalib olmaq üçün tanışın yoxdursa, heç olmasa ağlın və yumor hissin olsun...