Allahsızlar şəhəri:
İlk baxışdan adına görə qınanılan bu əsər Azərbaycan oxucusu üçün bir yenilikdir. Kitabın içində keçən adların hər biri insani keyfiyyətlərimizi əks etdirir. Bir də bu keyfiyyətlərimizi yoldan çıxaran bir şeytan obrazı... Şeytan onları yoldan çıxartmağa çalışdıqca onlar öz həqiqətlərini tapmağa başlayırlar.
Kitab alleqorik üslubda yazılıb və kitabın bütün obrazlarını Azərbaycanın məşhur aktyorları canlandırıb. Bu simalardan Rasim Balayev, Taleh Yüzbəyov, Kamran Yunis, Fikrət Məmmədov və Namiq Ağayevin adlarını çəkmək olar.
Hər şey “Ölüm dükanı”nda çalışan Ölümün əyyaşa və narkomana həyat qısaldan maddələri satması ilə başlayır. Onların gedişindən sonra Həqiqətə zərərli maddələri sata bilməyən satıcı onu yaşadığımız cəmiyyətdən qovub uzaqlaşdırmağa çalışır. Halbuki Həqiqətin cəmi bir sualı var idi: öldürürsə, bunları bizə niyə satırsınız?
Həqiqət qaçıb gizlənir, insanlardan uzaqlaşmağa başlayır. O nə qədər uzaqlaşmağa çalışsa da, insanlar onu axtarmağa davam edirlər. Tapanda isə dözməyib ona lənət oxuyur, səsini kəsib susdurmağa çalışırlar. Çünki biz çılpaq həqiqəti qəbul edə bilmirik, çılpaq olanlara isə təklikdə baxmağı sevirik.
“Allahsızlar şəhəri” kitabı daha çox mütaliəyə yeni başlayan oxucular, eləcə də yeniyetmələr üçün daha münasibdir. Həmçinin, “Cəhənnəmin xəritəsi” kitabının alt qatlarını anlamaq istəyənlər üçün bu kitab mütləqdir.
Şərhlər (30)