Bu kitab hərbi xidmətə yollanmağa hazırlaşan bir gəncin yolüstü dayanacaqları kimidir. Elyas getməzdən əvvəl təkcə çantasını toplamır; keçmişini, atasının susqunluğunu, anasının ölümünü, içində böyüyən nifrəti, cavabsız qalan suallarını və gələcəklə bağlı qorxularını da özü ilə aparmağa hazırlaşır. Amma insan yolun haraya apardığını bilməzdən əvvəl bəzən kimin sözü ilə yola çıxdığını anlamalıdır.
Elyas müəllimi ilə danışır, atasını dinləyir, psixoloqun qarşısında öz içindəki qapılara baxır, balaca bir uşağın sadə sualları qarşısında susur, sevdiyi insanla özünü bölüşməyə çalışır, gecənin qaranlığında bir qadının taleyi ilə üz-üzə gəlir, qəzet satan qocadan həqiqətin satılmadığını öyrənir. Hər söhbət bir cavab deyil, yeni bir sualdır. Hər insan Elyasın yoluna təsadüfən çıxmır; hər biri onun içində çoxdan danışan, amma hələ adını tapa bilmədiyi səsə çevrilir.
Bu kitabda müharibə yalnız cəbhədə deyil. Müharibə atanın yaddaşındadır, ananın yoxluğundadır, uşağın sualındadır, qadının gecə dayanacağında gözlədiyi qapıdadır, gəncin içində böyüyən qisasla mərhəmət arasındadır. Elyas hərbiyə gedir, amma əsl döyüş onun daxilində başlayır.
“Elyasın Hekayəsi” cavablar kitabı deyil. Bu, sualların kitabıdır. Çünki bəzən insanın böyüməsi hər şeyi bilməsindən yox, “bilmirəm” deməkdən qorxmamasından başlayır.
Şərhlər (0)