Coşqun dənizim-Xəzər — Məhdiyyə

Ləpələr sahilə tərəf hey gəlir,

Sanki hicranına dözməyir sular.

Qovuşur Xəzərim gözəl sahilə,

Təkrar ayırırlar onu dalğalar.

Buludlar yığılıb tamaşa edir,

Bu əsrlər boyu sürən sevgiyə.

Günəş də arabir özün göstərir

Bulud arxasından bu aşiqlərə.

Küləklər yüksəldir yenə dənizi,

Ax, necə qüdrətli olur Xəzərim?!

Gördükcə vurulur Sahil yenidən:

“Ey mənim coşqun Xəzər dənizim!”

Qışqırır Sahilin uçan qumları,

Çatmaq ümidi ilə havada gəzir.

Bu iki aşiqin nakam sevgisi

Beləcə əbədi, hey davam edir.