Bölüm otuz bir

Bölüm Otuz Bir

Qrupu kor-koranə açmaq istəmirdim. Əvvəlcə digər WhatsApp qruplarını analiz edir, hansında reklam edə biləcəyimi müəyyənləşdirməyə çalışırdım. Çünki reklam verəcəksənsə, qarşıdakı adamın qrupundakı sayı deyil, auditoriyasının sənə uyğun olub-olmamasına baxmalısan. Uyğunsuz bir kontentin qarşısına çıxmaq, həm sənin reklamının effektsiz qalmasına, həm də qarşı tərəfin aktivliyinin azalmasına səbəb ola bilər.

Reklamla bağlı bir çox əsas prinsipləri bilirdim. Onlardan biri də budur: reklamı sadəcə bir dəfə göstərmək kifayət deyil. Eyni auditoriyaya fərqli formalarda, müxtəlif vaxtlarda təkrar-təkrar çıxmaq daha effektivdir. Yəni 1000 nəfərin qarşısına bir dəfə çıxmaqdansa, 100 nəfərin qarşısına 5 dəfə çıxmaq daha güclü nəticə verir.

Kitab kanalları arasında mənim kontentimə ən uyğun olanı İlhamə Bayramova adlı bir ibtidai sinif müəlliminin qrupu idi. Başlanğıcda reklama pulum çıxsa da, sonradan bir çox məsələdə mənə dəstək oldu. Bu mənə həm texniki, həm də mənəvi motivasiya verdi.

Davamlı reklam etdikcə yazırdım ki, “300 nəfər olduqda başlamağı planlaşdırıram.” Bir çoxları şübhə ilə yanaşdı, “300 nəfəri neçə aya yığa bilərsən?” — dedilər. Amma vəziyyət elə gətirdi ki, cəmi bir həftə içində 300 nəfərlik qrup tamamlandı və yazmağa başladım.

---

Başlanğıcda bu qrupu sadəcə yazılarımın baxılması üçün yaratmışdım. Öz yazılarımı tək-tək insanlara göndərmək istəmirdim. Qrup bu baxımdan çox funksional idi — istəyən daxil olub oxuya bilərdi, heç kimə məcburiyyət yox idi. Amma yaxşı bilirdim ki, bir çox insan 50-dən çox qrupa qoşulur, amma sonradan heç birinə baxmır.

Bunu nəzərə alaraq, qrup daxilində müəyyən bir disiplin yaratmağı qərara aldım. Yazıları oxuyanlardan kiçik bir reaksiya — bir emoji, bir "oxudum" mesajı — tələb edirdim. Bu sadə metod zamanla yazılarla daha güclü bir bağ yaratdı. Oxucu ilə yazıçı arasında qarşılıqlı hörmət və etibar formalaşmağa başladı.

Bununla yanaşı, kimlərin aktiv, kimlərin passiv olduğunu ayırd etmək üçün sistem qurmağa başladım. Oxuyanların adlarını kontaktlarımda qeyd edirdim. Başlanğıcda “test-1”, “test-2” kimi qeyd edirdimsə də, sonradan bu sistemi təkmilləşdirdim. İndi qrupa qoşulan hər kəs ad-soyadını qeyd etməlidir, əks halda qəbul olunmur.

---

Bir yazıçını inkişaf etdirən əsas amillərdən biri — davamlı və həvəsli oxucu kütləsidir. Əgər sənin yeni yazılarını səbirsizliklə gözləyən insanlar varsa, onların dəyərini bilməlisən. Onlar üçün yazmağa, onlar üçün mübarizə aparmağa dəyər. Əks halda...