Bölüm otuz üç - Bəlkə də.

Bölüm 33 - Bəlkə də

Bəzi bölümləri yazmaq çox çətindir. Birinci bölümü yazmağa başlamaq da, son bölümü bitirmək də asan olmur. Sanki sözlər bir-birinə düyünlənir, əllərim tutulur, yazmaq üçün bir növ maneə yaranır. Sən istəmirsən ki, bitsin. Amma həyat belədir: Hekayələr bitməlidir ki, yeniləri başlaya bilsin.

Mənim hekayəm də bir növ bitmiş sayılır. Bu günə qədər yaşadıqlarımı, uğurlarımı və uğursuzluqlarımı sizinlə bölüşdüm. Bunu etdim ki, biləsiniz, bir yazıçı hansı yollardan keçə bilər, hansı çətinliklərlə qarşılaşır, necə sınaqlardan keçir.

Bu gün mənimlə əlaqədə olanlar məni uğurlu bir yazıçı kimi tanıyır. 50 mindən çox oxucu kütləm var, öz şəxsi saytıma sahibəm, yazılarımın bölümlərini səbirsizliklə gözləyən insanlar var. Amma bu yolda bu nəticələri əldə etmək heç də asan olmadı.

Son bölümə başlamazdan öncə istədim ki, sonda deyəcəyim sözləri əvvəldə deyəm. Çünki bu dəqiqə sözlərim mahiyyət daşıyırsa, illər sonra uğurlu ola bildiyim üçün sizlərə qiymətli görünür. Amma bunu əldə etmək o qədər də sadə olmayıb.

----------

Mir.az saytında mənə verilən reklam imkanları, əvvəlcə məni çox sevindirmişdi. O vaxtlar düşünürdüm ki, bir gün vaxt tapıb saytın qurucusu ilə görüşəcəm. Və sonunda bu görüş gerçəkləşdi. Sözügedən görüşdə çox maraqlı bir şey baş verdi. Görüşdük və söhbət əsnasında başa düşdük ki, fikirlərimiz bir-birinə çox yaxındır. Məsələn, mən mistika yazıram, o isə fantastika sevən bir insandır. Mənim yaradıcı təxəyyülüm var, o isə mühəndisdir, ideyaların arxasında durur. Və hər ikimiz bu cəmiyyətdə faydalı olmağa çalışırdıq.

O görüşdən sonra Cəlal mənə yazdı. Dedi, “Səni admin edirəm, bundan sonra reklamlarını pulsuz paylaşarsan.” Bu, mənim üçün çox böyük bir jest idi. Həqiqətən təşəkkür etdim və qəbul etdim. Amma mən özümü reklam etmədim. Həmişə özümə ayırdığım pulun bu dəfə mir.az-ın inkişafı üçün olmasına qərar verdim. Beləliklə, digər qruplarda reklamlar verməyə başladım, ancaq bu dəfə öz cibimdən. Özümü reklam edəndə çox az adam maraq göstərirdi, amma ümumi bir saytı reklam edəndə, hər kəsdən daha çox reaksiyalar alırdım. Bu məni daha da ruhlandırdı.

Bir müddət sonra Cəlal da reklamlara pul ayırmağa başladı. Və mir.az-ın WhatsApp kanallarını idarə etməyə başladım. Başlanğıcda bir kanalın 1000 izləyicisi vardı, amma bir neçə ay sonra həmin kanal 4000 nəfərə çatdı. Əsas gücümüzü kanalın artımına yönəltdik, çünki bilirdik ki, WhatsApp-ın kəşf bölməsi yaxın zamanda açılacaq. Açıldığı zaman isə ən çox izləyicisi olan kanallar insanlara görünəcək.

Vizyonu görə bilmək çox vacibdir. Uzaqgörənlik sənə 5 addım sonrasını göstərə bilər, sən də ona uyğun hərəkət edərsən. Və nəhayət, WhatsApp kanalları açıldığında izləyici sayı sürətlə artmağa başladı. Bir kanalda 27 min, birində 16 min, başqa birində isə 14-15 min izləyici qazandıq. Adımız ön sıralarda olduğu üçün kitab oxucuları özləri gəlirdi.

Günümüzdə, kanalda reklamlar verərək uğurlu bir yol davam etdiririk. Amma başlanğıcı düşünəndə, mən 1000 nəfərlik qrupa min manata yaxıb məbləğ xərclədim. Amma bu xərclər gələcəkdə mənə daha çox qayıdıb. Başlanğıcda etdiyin yatırımlar, uğur qazananda geri dönür.

İnsan bəzən düşünür, bəlkə də hər şey tam fərqli ola bilərdi. Bəlkə də yazıçı olmayıb, atamın yolunda futbol hakimi olaraq davam etsəydim, həyatım başqa cür olardı. Hələ də futbol hakimi kimi fəaliyyət göstərirəm, amma arzuladığım uğurları əldə edə bilməmişəm. Bəlkə də yazıçılığı dayandırıb əsas peşəmə geri dönməyin vaxtıdır. Bəlkə də bu hekayə 27 yaşlı bir gəncin öz aləmində qurduğu balaca dünyanın divarlarından kənara çıxmır. Bəlkə də elə hər şey elə bura qədər imiş. Bəlkə də kitab elə burdaca dayansa daha yaxşıdır. Bəlkə də sonda gözlədiyiniz həyat dərsini anlamaq üçün kitabın əvvəlinə qayıdıb hər şeyi bir də diqqətlə oxumağın tam vaxtıdır.