İnsanlıq axtarıram mən

Qayğıkeş düşüncə, diqqətli bir can,

Dərdə həmdəm olub, hər an alışan,

Bu həyatda haqqı ilə çalışan,

İnsan yox, insanlıq axtarıram mən.

Səhvi başqasında axtarma hər an,

Özünə nəzər sal, özünə inan,

Vicdan aynasına hər səhər baxan

İnsan yox, insanlıq axtarıram mən.

Zaman ötüb keçir, ömür bir anlıq,

Qalmasın kimsədə bir nigaranlıq,

Otaqda gəzirəm, otaq qaranlıq,

İnsan yox, insanlıq axtarıram mən.

İnsanla insanlıq eynidir sanma,

Axtarırsan? Onda axtar dayanma,

Adamla doludur hər tərəf amma,

İnsan yox, insanlıq axtarıram mən.