Başqasına yazılmış bir şeir... - Şahmalı Hasan

Başqasına yazılmış bir şeir kimi...

Hər kəsin bir sevdiyi var:

Kimi qadın saçlarının ətrini,

Kimi bağda açan gülləri,

Kimi barıt qoxan silahını,

Kimi də ağ kağızla qara qələmi sevər...

Hər kəsin bir arzusu var:

Kimi o saçlara sığal çəkməyi,

Kimi açan gülləri qoxlamağı,

Kimi intiqam yanğısını söndürməyi, 

Kimi də sadəcə bir şeir yazmağı dilər...

Hər kəsin bir qorxusu var:

Kimi qorxar ki, o saçlara yad əl dəyər,

Kimi qorxar ki, bağına payız tez gələr,

Kimi qorxar ki, öldürmədən də ölər

Kimi də qorxar ki...

Şair də qorxar ki, şeirini dinləyər O

Başqasına yazılmış bir şeir kimi...