İSAKIN CİNAYƏTİ – Bölüm 4
Mandarin otel
Deyvid üzünü Alisaya çevirərək dedi:
– Əgər zəng gələn telefon anbardadırsa, bu o deməkdir ki, cinayətdə Mandarin otelinin personalının da əli var…
Deyvid və Alisa birinci mərtəbəyə enib resepsiyona yaxınlaşdılar. Deyvid irəli keçərək söhbətə başladı:
– Salam.
– Salam, cənab. Mandarin otelə xoş gəlmisiniz! Sizi burada görməkdən şadıq.
– Biz isə heç də şad deyilik, – deyə Deyvid cavab verdi və cibindən polis vəsiqəsini çıxararaq göstərdi. – Manhattan polisi, Deyvid Bekir.
– Buyurun, cənab Bekir. Problem nədir?
– İsak bəyin cinayəti.
– 18-ci mərtəbə, otaq 663… İsak bəy. Əsl adı ilə desək, Xəyal Cəfərov.
– Əsl adı?
– Bəli. O, əslən Azərbaycan vətəndaşıdır. Yazdığı kitablar və musiqiləri ilə ölkəsində tanınmış biridir. Hətta ölkəmizdə belə kitabları çoxlu sayda satılır.
– Demək azərbaycanlıdır. Bəs o, otağında qalırdı?
– Bəli, lakin arada yaxın dostu onu ziyarətə gəlirdi.
– Yaxın dostu haqqında məlumatınız var?
– Əlbəttə. M. Mahmudov.
– Harada yaşadığını bilirsiniz?
– Bəli. O, Azərbaycanın paytaxtı Bakı şəhərində yaşayır. Bir həftə əvvəl Xəyal bəylə sağollaşıb Bakıya geri döndü.
– Bəs sən bu qədər məlumatı haradan bilirsən?
– Biz müştərilərimiz barədə hər bir məlumatı öyrənirik. Baxın, indi necə lazım olur.
– Aha… düz deyirsən, bizə indi elə sən özün də lazımsan.
– Necə yəni?
– Otaq 662 niyə bağlıdır?
– Otaq təmirə çıxarılıb, – deyə gözlərini qaçırdı.
– Demək təmirdədir. Bəs otaqda olan telefon?
– Hamısı təmir üçün anbara göndərilib.
– Bu da o deməkdir ki, 662 nömrəli otağın 56-47 daxili telefonu işlək vəziyyətdə deyil, eləmi?
– E… ee… bəli, doğru deyirsiniz. Qeyd etdiyiniz telefon işləmir.
– Bəs necə olur ki, həmin telefondan 9-1-1-ə İsakın özünü öldürdüyü barədə məlumat verilir?
– Cənab, bu dediyiniz mümkün deyil, – deyə əlləri əsərək alnının tərini sildi.
– Mümkün olmasaydı, bizə zəng gələn nömrə bu olmazdı, – Deyvid üzünü Alisaya çevirərək əlavə etdi: – Zəhmət olmasa, cənabı öz gözəl nəzarətimiz altına alın. Bu axşam sorğuya çəkiləcək.
Şərhlər (0)