Mən olmamışam?

Qarşımda yad kimi dayanan gözəl,

Bir zaman sevdiyin mən olmamışam?

Bahar çiçəklərin olanda xəzəl, 

Təsəlli verənin mən olmamışam?


Səni mən hər kəsdən daha çox sevdim, 

Hər gün qapınıza güllərlə gəldim,

İndi yad kimisən durub düşündüm,

Başına dolanan mən olmamışam? 


Bir zaman sevgiylə baxan gözlərin, 

Məni məndən alan şirin sözlərin, 

Məni tanımayıb baxan gözəlin, 

Bir vaxt ən yaxını mən olmamışam? 


Gözlərim gözünə dikilib qaldı,

Qarşımda dayanan elə bil laldı, 

O soyuq baxışlar canımı aldı, 

Sanki bu dünyada mən olmamışam. 


Bilməzdim vəfasız olacaq yarım, 

Bu sevgi dastanı qalacaq yarım. 

Sənin gedişinlə bil darmadağın 

Dünyası qaralan mən olmamışam? 


Get, daha qarşımda belə dayanma, 

Qəflət yuxusundan daha oyanma, 

Məni sevdiyindən heç vaxt utanma, 

Düşün həyatında mən olmamışam...