Tək sənə həsrətəm, tək sənə möhtac

Tək sənə həsrətəm, tək sənə möhtac 

Xəyalım dolanır hey uzaqlarda, 

Bilmirəm mən səni axtarım harda. 

İyul günəşisən sən dekabrda

Tək sənə həsrətəm, tək sənə möhtac. 

Gecələr yuxum yox, gündüz qərarım, 

Sən idin dünyada qiymətli varım. 

Məni atıb gedən sevgili yarım,

Tək sənə həsrətəm, tək sənə möhtac. 

Çarəsiz qalmışam sən gedən gündən, 

Bütün insanlara olmuşam düşmən. 

Dünyadan əl üzüb tənha qalan mən, 

Tək sənə həsrətəm, tək sənə möhtac. 

Qışda baharımsan, yayda qarımsan, 

Sənsiz tam olmuram, mənim yarımsan.

Həyata keçməyən arzularımsan, 

Tək sənə həsrətəm, tək sənə möhtac. 

Baxdığım hər üzdə səni görürəm, 

İşığım sən idin, daha sönürəm.

Sənin yoxluğundan hər gün ölürəm,

Tək sənə həsrətəm, tək sənə möhtac.