Aylı gecələr

Aylı gecələrdir həmdəmim mənim,

Çoxalır qəlbimdə kədərim, qəmim.

Elə bil dəryada qərq olub gəmim

Gündüz yorğun ürək gecə dincələr,

İnsana həmdəmdir aylı gecələr. 

Gedir uzaqlara fikrim, xəyalım, 

Gənclik illərim, o uşaq çağlarım.

Keçmiş günlərimi yadıma salım

Keçən günə çatmaz gələcək günlər, 

İnsana həmdəmdir aylı gecələr. 

Ulduzlar içində durub nurlu ay, 

İşığından verir o hər yerə pay. 

Çayın şırıltısı salır hay-haray

Təbiət dincəlib yuxuya gedər, 

İnsana həmdəmdir aylı gecələr. 

Meh əsib titrədir yaşıl yarpağı,

Gecə öz sehriylə alıb torpağı. 

O uca dağları, o barlı bağı

O buz bulaqları xəyalım gəzər,

İnsana həmdəmdir aylı gecələr.